Að­stand­end­ur

Fjölskylda og vinir ganga oft í gegnum erfiða og flókna tíma í kjölfar krabbameinsgreiningar hjá ástvini sínum. Það er misjafnt hvernig við bregðumst við og tökumst á við erfiða atburði á borð við alvarleg veikindi ástvinar og algengt að hugsanir og tilfinningar af ýmsum toga geri vart við sig. 

Það getur verið misjafnt hvenær og hvort þörf fyrir stuðning skapast í veikindaferlinu. Þörfin fyrir stuðning og úrvinnslu kemur oft ekki fram fyrr en meðferð er lokið, eða jafnvel þegar nokkuð langt er liðið frá veikindunum eða ef þau taka sig upp aftur.

Fyrir maka eða nána aðstandendur getur verið mikill lærdómur og stórt skref að þiggja aðstoð eða stuðning. Þeir mega ekki gleyma að þegar þeir hlúa að eigin heilsu er það líka mikilvægt fyrir ástvin þeirra sem tekst á við krabbamein. Þegar aðstoð er þegin gæti það líka létt á mögulegri sektarkennd sem sá/sú veika gæti fundið fyrir vegna aukins álags sem maki eða náinn aðstandandi er undir vegna veikindanna.

Krabbameinsfélagið býður upp á fræðslu, ráðgjöf og stuðning við aðstandendur, hvort sem ástvinur er nýgreindur með krabbamein eða er með langvinnan sjúkdóm. 

Þjónusta af ýmsum toga, meðal annars:

• Hjálp við að takast á við erfiðar hugsanir og tilfinningar
• Upplýsingar um réttindi í veikindunum
• Upplýsingar um líkamleg og sálræn einkenni sem eðlilegt er að upplifa
• Fræðsla um úrræði og þjónustu sem gæti gagnast
• Ráðgjöf um hvernig best er að tala við börn um krabbamein
• Ráðgjöf um samskipti við aðra varðandi veikindin

Kynntu þér þjónustuna nánar:

• Ráðgjöf Krabbameinsfélagsins

Aðstandendur geta einnig leitað stuðnings hjá eftirfarandi:

• Stuðningsnet Krafts og Krabbameinsfélagsins
• Stuðningshópar

• Ljósið
• Landspítali