Saman­burður að­gerða með brjóst­hols­skurði og brjóst­hols­sjá

Lungnakrabbamein er þriðja algengasta krabbameinið á Íslandi og það krabbamein sem dregur flesta til dauða. Á undanförnum árum hafa orðið mjög miklar framfarir í greiningu og meðferð þessa mikilvæga krabbameins. Þar má nefna bætta myndgreiningu sem gerir okkur kleift að greina meinin fyrr og þegar þau eru minna útbreidd. 

Einnig hafa orðið miklar framfarir í meðferð, ekki síst í lyfjameðferð en einnig geislameðferð sjúklinga með útbreitt mein þar sem skurðaðgerð kemur ekki til greina. Skurðaðgerð er enn helsta læknandi meðferðin við lungnakrabbameini og sú sem er best rannsökuð. 

Á síðastliðnum áratug er komin fram tækni þar sem hægt er að gera 85% aðgerðanna með aðstoð brjóstholssjár (VATS) og í gegnum þrjá litla skurði, aðferð sem leysir sársaukafyllri brjóstholsskurð af hólmi. Verkir eru minni, sjúklingar fljótari að jafna sig og legutími styttri.

„Helsta markmið þessarar rannsóknar er að bera árangur þessara brjóstholsaðgerða saman við þær sem gerðar voru með brjóstholsskurði og meta hvort árangur hafi batnað, ekki síst hvað varðar alvarlega fylgikvilla og lifun,“ segir Tómas.

Verkefnið Nýjungar í skurðmeðferð lungnakrabbameins á Íslandi hlaut 1.920.000 króna styrk úr Vísindasjóði Krabbameinsfélagsins árið 2022, 2,8 milljóna króna styrk árið 2023 og 2,8 milljóna króna styrk árið 2024.

Framvinda (mars 2023)

Gangur í verkefninu var mjög góður á síðasta ári. Tveir nemar voru í fullu starfi við rannsóknir á skurðaðgerðum við lungnakrabbamein í fyrrasumar. Við hófum greinaskrif um innleiðslu VATS-aðgerða fyrir fjórum árum og hyggjumst kynna niðurstöðurnar á SATS-þinginu í Odense næsta sumar og á Evrópuþingi hjarta- og lugnaskurðlækna, EACTS, í Vín í október. Framahaldsstyrkurinn mun fara til þess að klára gagnavinnslu fyrir árin 2021, 2022 og 2023 og bera betur saman árangur VATS-aðgerða og opinna aðgerða.