Geng­ið í slaufu á Úlf­ars­felli

Mikil ánægja var með hversu vel tókst til í fyrra og því var ákveðið að endurtaka leikana í ár og fara þeir fram 17.-18. október.

Fyrsta ferðin verður farin föstudag, 17. október, kl. 16:00 og seinasta hópferðin á fellið verður kl. 15:00 laugardag.

Hvetjum öll til að taka þátt á sínum forsendum, ganga eina ferð eða fleiri allt eftir því hvað hentar hverjum og einum.

Farið er upp frá bílastæðinu fyrir ofan Úlfarsárdal fáfarna leið upp á topp og svo hefðbundna leið niður veginn aftur á bílastæðið. Gengin er gönguleið sem myndar Bleika slaufu og tekur sú ganga frá 45 til 90 mín.

Biskup Íslands, Guðrún Karls Helgudóttir, mun ganga með hópnum kl. 20:00, á föstudag, upp á Úlfarsfell þar sem Ljósastundin mun fara fram. Biskup mun flytja stutta hugvekju.

Töfrarnir í samstöðunni – hvetjum hvort annað 

Töfrarnir við Styrkleikana felast í samstöðunni og því hvetjum við fjölskyldur, vinahópa og vinnustaði til að mæta saman og vera hvatning hvort fyrir annað. Hver fer fjallið á sínum forsendum, í fyrra gekk ein vinkona til dæmis jafn margar ferðir og vinkona hennar hafði farið í lyfjagjöf og ein fjölskylda gekk saman til minningar um náinn ástvin. 

Samhliða göngunni geta einstaklingar og hópar tekið þátt í áheitasöfnun, en allt fé sem safnast rennur til rannsókna á krabbameinum og til að veita fólki með krabbamein og aðstandendum þeirra ókeypis stuðning, ráðgjöf og þjónustu.

Ljósastund sem snertir hjartastrengi 

Þegar rökkvar er haldin ljósastund, sem margir þátttakendur hafa lýst að snerti hjartastrengina á einstakan hátt. Að þessu sinni verður lagt af stað frá bílastæðinu klukkan 20:00 á föstudagskvöldinu og á toppnum verður kveikt á kertum sem þátttakendur geta keypt til stuðnings Krabbameinsfélaginu.  

Við hvetjum öll til að koma klædd eftir veðri, í góðum skóm, með fullhlaðna síma og muna eftir höfuðljósi (vasaljósi) þegar fer að dimma. 

Sjáumst á Úlfarsfelli!