Áfengi
Áfengi er staðfestur krabbameinsvaldur og því meira sem er drukkið, því meiri er áhættan á krabbameini.
Best er að sleppa því alfarið að drekka áfengi en einnig er ávinningur af því að draga úr neyslu þess.
Áfengisneysla eykur líkur á krabbameinum.
Ekki skiptir máli hvaða tegundir áfengis um ræðir (t.d. bjór, vín eða sterkt áfengi) heldur aukast líkurnar á krabbameinum eftir því sem meira er drukkið og því lengri tíma sem drykkjan nær yfir.
Til að draga úr krabbameinsáhættu er æskilegast að sleppa því alfarið að drekka áfengi en þó er einnig til bóta að draga úr neyslunni enda tengist áhættan heildarneyslunni.
Hvers konar krabbameinum getur áfengi valdið?
Neysla áfengis getur valdið a.m.k. kosti sjö mismunandi tegundum krabbameina: í munni, vélinda, koki, barkakýli, lifur, brjóstum og ristli og endaþarmi.
Hvers vegna veldur áfengi krabbameini og öðrum sjúkdómum?
Það eru nokkrar ástæður fyrir því að áfengi veldur krabbameinum. Líklegt er að mismunandi tegundir krabbameina orsakist af mismunandi ástæðum, t.d.:
- Etanól og asetaldehýð: Áfengi (etanól) er umbreytt í líkama okkar í efnasambandið asetaldehýð. Bæði etanól og asetaldehýð eru krabbameinsvaldandi.
- Skorpulifur: Áfengi skaðar lifrarfrumur og getur valdið skorpulifur, sem eykur líkur á að fá krabbamein.
- Hormón: Áfengi getur aukið magn sumra hormóna, eins og estrógens. Mikið magn af estrógeni eykur hættu á brjóstakrabbameini.
![Áfengi](/_next/image?url=https%3A%2F%2Fkrabb.payload.is%2Fmedia%2Fafengi-2000x1051.jpg&w=2048&q=75)
Hvað ef ég drekk áfengi og reyki tóbak?
Tóbaksreykingar samhliða áfengisdrykkju eru sérlega varhugaverð blanda sem margfaldar krabbameinsáhættu, þ.e. áhættan verður meiri en samanlögð áhættan af reykingum og áfengi. Áfengisdrykkja auðveldar vefjunum í munni og koki að taka upp krabbameinsvaldandi efni úr tóbaksreyknum. Fólk sem bæði reykir og drekkur er í sérstaklega mikilli hættu á að fá krabbamein í munni, koki og vélinda.