Taktu þátt í skemmtilegum jólaleik 2024
Litríkt, jólalegt og hollt á borðið þitt. Pössum upp á að hollustan gleymist ekki í jólaamstrinu. Með heilsusamlegu mataræði og lífsstíl er hægt að sporna við fjórum af hverjum tíu krabbameinstilfellum.
Krabbameinsfélagið í samstarfi við Banana og Hagkaup óska eftir jólalegum útfærslum á framsetningu á grænmeti, kryddjurtum, ávöxtum og berjum til að nýta á jólaborðið eða veislubakkann. Veglegir vinningar í boði.
Finndu sniðuga útfærslu á því hvernig bera megi fram grænmeti, kryddjurtir og/eða ávexti og ber á jólalegan og nýstárlegan hátt. Gefið hugmyndafluginu lausan tauminn.
Framsetning er frjáls en getur t.d. verið meðlæti á veisluborð, skemmtilega framsettur veislubakki eða máltíð eða bara hvaðeina sem þér dettur í hug.
Reglur:
Nota má hvaða grænmeti, kryddjurtir, ávexti og ber sem er. Flatarmál disks eða bakka má ekki vera meira en 50 x 40 cm.
Vinningar verða veittir fyrir þrjú efstu sætin:
- 1. sæti: Bananar gefa 60.000 kr. peningaverðlaun ásamt ávaxtakörfu og Hagkaup gefur gjafabréf að upphæð 40.000 kr.
- 2. sæti: Bananar gefa 25.000 kr. peningaverðlaun ásamt ávaxtakörfu og Hagkaup gefur gjafabréf að upphæð 25.000 kr.
- 3. sæti: Bananar gefa 15.000 kr. peningaverðlaun ásamt ávaxtakörfu og Hagkaup gefur gjafabréf að upphæð 15.000 kr.
Einnig verða veitt nokkur aukaverðlaun frá Lemon fyrir skemmtilegar útfærslur.
Hvað þarft þú að gera til að vera með:
- Skrá þig til leiks á jol@krabb.is fyrir miðnætti fimmtudaginn 12. desember.
- Skilaðu inn þínu framlagi við Hagkaup í Smáralind þann 14. desember, milli kl. 12:30 og 13:00, ásamt innihaldslýsingu. Úrslit verða kynnt þar kl. 14:00.
Dómnefnd skipa: - Sigrún Elva Einarsdóttir, sérfræðingur í fræðsludeild Krabbameinsfélagsins.
- Jóhanna Jónsdóttir, framkvæmdastjóri Banana.
- Rakel María Hjaltadóttir.
- Sjöfn Þórðardóttir, umsjónarmaður matarvefs Mbl.is.
Töfrandi jólaleyniskógur bar sigur úr bítum í Jólaleiknum 2023
Viðbrögðin við jólaleiknum voru góð og úrslitin voru tilkynnt í Hagkaup Smáralind. Eins og myndirnar sýna þá er hægt að gera skemmtilegar útfærslur án þess að það sé of tímafrekt eða flókið þó vissulega taki sumar hugmyndirnar ögn lengri tíma en aðrar. Sjón er sögu ríkari.
1. sæti: Töfrandi jólaleyniskógur, Rūta Vaišvilaitė, 2. sæti: Litskrúðugur ávaxta- og berjakrans, Miglė Milinauskaitė og í 3. sæti: Fallegt og girnilegt ávaxtatré, Ingibjörg Pálsdóttir.
Veitt voru aukaverðlaun og hér má sjá nokkrar af þeim tillögum: Ramona Pittroff gerði skemmtilega útfærslu af Trölla, Nína Margrét Jónsdóttir gerði Vegan - vöggu á jólanótt og Miglė Milinauskaitė skemmtilegar appelsínuskálar.